ఢిల్లీ ఎయిర్‌పోర్ట్‌లో పంజాబ్ సీఎంకు జరిమానా.. రాజకీయ దుమారం

పంజాబ్ ముఖ్యమంత్రి భగవంత్ మాన్‌కు ఢిల్లీ విమానాశ్రయంలో అవమానం జరిగిందని, ఆయనకు రూ.50,000 జరిమానా విధించారని ఆమ్ ఆద్మీ పార్టీ (ఆప్) తీవ్ర ఆరోపణలు చేసింది. ఫ్రాన్స్ పర్యటన ముగించుకుని తిరిగి వచ్చిన ఆయనను సుమారు మూడు గంటల పాటు ఉద్దేశపూర్వకంగా నిర్బంధించారని ఆప్ విమర్శించింది. ఈ ఘటన దేశవ్యాప్తంగా రాజకీయ దుమారం రేపింది.

ఆప్ పంజాబ్ మీడియా ఇన్‌చార్జి బల్తేజ్ పన్ను మాట్లాడుతూ... ఫ్రాన్స్‌లోని ఓ ఫుడ్ ఫెస్టివల్‌లో పంజాబ్ ఉత్పత్తులను ప్రమోట్ చేసి తిరిగివచ్చిన సీఎం భగవంత్ మాన్‌ను ఢిల్లీ ఎయిర్‌పోర్ట్‌లో కస్టమ్స్ అధికారులు అడ్డుకున్నారని తెలిపారు. లగేజీ తనిఖీల పేరుతో గంటల తరబడి వేచి చూసేలా చేసి, ఆ తర్వాత 'పైనుంచి తీవ్ర ఒత్తిడి ఉంది' అని చెబుతూ రూ.50,000 జరిమానా విధించారని ఆరోపించారు. కేంద్ర ప్రభుత్వ నిరభ్యంతర పత్రాన్ని కోర్టు ద్వారా తోసిపుచ్చి మరీ సీఎం ఫ్రాన్స్ వెళ్లారని, అందుకే కేంద్రం కక్షసాధింపు చర్యలకు పాల్పడిందని ఆప్ నేత సౌరభ్ భరద్వాజ్ విమర్శించారు.

అయితే, ఈ ఆరోపణలపై కస్టమ్స్ వర్గాలు భిన్నమైన కథనాన్ని వినిపిస్తున్నాయి. భగవంత్ మాన్ తన లగేజీలోని కొన్ని వస్తువులను డిక్లేర్ చేయనందువల్లే నిబంధనల ప్రకారం జరిమానా విధించినట్లు కొన్ని వర్గాలు తెలిపాయి. ఇదిలా ఉండగా, మరికొందరు ఉన్నతాధికారులు మాత్రం ఇది కేవలం రొటీన్ తనిఖీ అని, సీఎం పూర్తిగా సహకరించారని, ఎలాంటి అభ్యంతరకర వస్తువులు లభించలేదని స్పష్టం చేసినట్లు సమాచారం.

మరోవైపు, పంజాబ్ విపక్షమైన శిరోమణి అకాలీదళ్ నేత బిక్రమ్ సింగ్ మజిథియా కూడా ఈ ఘటనపై స్పందించారు. పరిమితికి మించి లగేజీ లేదా నగదు తీసుకువచ్చారన్న ఆరోపణలతోనే సీఎం, ఆయన భార్యను అధికారులు ప్రశ్నించినట్లు తమకు తెలిసిందని పేర్కొన్నారు. మొత్తంమీద ఈ ఘటనతో కేంద్రం, ఆప్ మధ్య రాజకీయ వైరం మరోసారి బయటపడింది.